6-njy awgust, Awaza – Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatynyň (LLDC3) çäklerinde "Awaza" milli syýahatçylyk zolagynda birnäçe möhüm çäreler geçirildi.

Günüň dowamynda gatnaşyjy döwletleriň ýokary derejeli wekiliýetleriniň gatnaşmagynda tematiki mejlisler, maslahatlar hem-de ikitaraplaýyn duşuşyklar guraldy. Bu çärelerde ulag we logistika mümkinçiliklerini giňeltmek, sebitara hyzmatdaşlygy pugtalandyrmak, şeýle hem infrastrukturany ösdürmek meseleleri boýunça pikir alyşmalar boldy.

Şeýle hem, deňze çykalgasy bolmadyk ýurtlaryň öňünde duran meseleler, olaryň ykdysady ösüş mümkinçilikleri we durnukly ösüş maksatlaryna ýetmegiň ugurlary ara alnyp maslahatlaşyldy.

Duşuşyklaryň dowamynda BMG-niň, Aziýa infrastruktura maýa goýum bankynyň (AIIB), halkara we sebitleýin guramalaryň wekilleri çykyş edip, hyzmatdaşlygyň täze mümkinçilikleri baradaky garaýyşlaryny beýan etdiler.

Maslahatyň çäklerindäki çäreler gatnaşyjy ýurtlaryň arasynda özara düşünişmegi, hyzmatdaşlygy ösdürmegi hem-de transport-logistika ulgamynda bilelikdäki tagallalary güýçlendirmegi maksat edinýär.